Чтения дня
Иоанна 21:15-25 (на утрене. Евангелие 11-e)
Галатам 6:11-18
Луки 16:19-31 
СПРЯТАТЬ ТРОПАРИТропарь воскресный, глас 5.
Собезнача́льное Сло́во Отцу́ и Ду́хови,/ от Де́вы ро́ждшееся на спасе́ние на́ше,/ воспои́м, ве́рнии, и поклони́мся,/ я́ко благоволи́ пло́тию взы́ти на Кре́ст,/ и сме́рть претерпе́ти,/ и воскреси́ти уме́ршия/ сла́вным воскресе́нием Свои́м.
Богородичен, глас тойже.
Ра́дуйся, две́ре Госпо́дня непроходи́мая./ Ра́дуйся, стено́ и покро́ве притека́ющих к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й от воспева́ющих,/ и кла́няющихся рождеству́ Твоему́.
Кондак, глас тойже.
Ко а́ду, Спа́се мой, соше́л еси́,/ и врата́ сокруши́вый я́ко всеси́лен,/ уме́рших я́ко Созда́тель совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бы́сть,/ Человеколю́бче, те́мже вси зове́м:/ спаси́ нас, Го́споди.
Мчч. Маркиана и Мартирия. Тропарь, глас 1.
Му́ченик дво́ица единонра́вная,/ Маркиа́н с Марти́рием сла́вным, Áриево нече́стие разруши́ша/ и Соприсносу́щна Сы́на Отцу́ и Ду́хови ве́ровати научи́ша,/ Па́влу повину́ющеся и́стинных повеле́ний учи́телю,/ те́мже мече́м убие́ни, умро́ша;/ и при́сно со Христо́м живу́ще,/ о нас Того́ мо́лят/ спасти́ ду́ши на́ша.
Кондак, глас 4.
Подви́гшеся до́бре от младе́нства,/ Маркиа́не с му́дрым Марти́рием,/ отсту́пника Áрия низложи́сте,/ невре́дно сохра́нше Правосла́вную ве́ру,/ Па́влу после́дующе, му́дрому учи́телю,/ те́мже с ним обрето́сте живо́т,/ я́ко Тро́ицы побо́рницы изря́днейшии.
Прав. Тавифы. Тропарь, глас 4.
Днесь ве́ра Христо́ва утвержда́ется ка́мнем ве́ры,/ и ликовству́ет в весе́лии Иоппи́я,/ псало́мски славосло́вят Жизнода́вца Сы́на Бо́жия ве́рнии,/ ви́дяще соверша́емо ве́лие чу́до:/ первоверхо́вный апо́стол глаго́лет,/ и уме́ршая востае́т от гро́ба,/ ю́же Низложи́тель сме́рти да́рует Це́ркви,/ да украша́ются во о́браз ея́ доброде́тельми лю́ди./ Прииди́те у́бо, христиа́не,/ принесе́м ко святе́й моле́ния на́ша:/ блаже́нная Тави́фо и милосе́рдная,/ вознеси́ на́ша воздыха́ния Пресвяте́й Тро́ице/ и моли́ся со дерзнове́нием,/ да сы́нове Све́та Преве́чнаго бу́дем,/ да сподо́бимся Бо́жия ми́лости,/ да пребыва́ем в любви́ Боже́ственней,/ и да ца́рствует мир во вселе́нней.
Кондак, глас 4.
Ужаса́хуся Иоппи́йстии лю́дие, и дивля́хуся Áнгели Бо́жии,/ егда́ исцели́вый Енне́я воззва́ от ме́ртвых се́рну нарица́емую, милосе́рдием преукра́шенную,/ о не́йже к нему́ взыва́ху вдо́вицы неиму́щыя./ И ны́не, Тави́фо блаже́нная, услы́ши моли́твы на́ша, к тебе́ приноси́мыя,/ и испроси́ у вся́ческих благ Пода́теля ми́лости и щедро́ты ве́рным Его́,/ да, блажа́ще тя, вопие́м ти:/ ра́дуйся, доброде́тели нас науча́ющая.
Прп. Мартирия, диакона Печерского, в Дальних пещерах. Тропарь, глас 1.
Служи́вый в чи́ну диа́конства Го́сподеви до́бре,/ честны́й иеродиа́коне Марти́рие,/ и та́мо я́ко слуга́ Госпо́день обреты́йся,/ иде́же и Госпо́дь твой,/ моли́ся Ему́ и о нас,/ да пода́ст нам ве́лию ми́лость.
Кондак, глас 2.
Диа́коне честны́й, и́ночествующим похвало́/ и преподо́бным соприча́стниче всебла́женне Марти́рие,/ моли́ся Го́сподеви непреста́нно о всех нас.