Православный календарь

СПРЯТАТЬ ТРОПАРИ

Сщмч. Панкратия, еп. Тавроменийского. Тропарь, глас 8.
Я́ко стрела́ огнезра́чная,/ от Верхо́внаго по́слан был еси́ Тавромени́йскому престо́лу/ уязвля́ти безбо́жных злоче́стие,/ ве́рных же сердца́ просвеща́ти,/ я́же боговеща́нными твои́ми словесы́ в ве́ре утверди́в/ и тече́ние соверши́в, пострада́л еси́ до кро́ве,/ священному́чениче Панкра́тие,/ моли́ за вся, пою́щия па́мять твою́.

Ин тропарь, глас 4.
И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодохнове́нне,/ в виде́ния восхо́д,/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Панкра́тие./ Моли́ Христа́ Бо́га/ спасти́ся душа́м на́шим.

Кондак, глас 4.
Све́тлая тавромени́ом, Панкра́тие, звезда́ показа́лся еси́/ и священнострада́лец яви́лся еси́ за Христа́,/ Ему́же ны́не предстоя́, моли́ за чту́щия тя, блаже́нне.

Свт. Феодора, еп. Едесского. Тропарь, глас 4.
Апо́столом подра́жатель/ и боже́ственных уче́ний столп бысть,/ тем ко Христу́ притече́,/ моле́нием, блаже́нне, Моа́вия царя́ све́том Креще́ния просвеще́на показа́, Фео́доре,/ и испове́дания ра́ди кровь свою́ излия́л есть,/ исхода́тайствен тому́ яви́ся вене́ц от Христа́ Царя́,/ Его́же моли́ спасти́ ду́ши на́ша.

Ин тропарь, глас 4.
Нево́лею па́ству святи́тельскую прии́м,/ но во́лею подви́гнувся о Бо́жии Це́ркви,/ и пе́рстию Христо́ва гро́ба неве́рнаго Моа́вия царя́ уве́рив,/ и с теле́сною слепото́ю вку́пе и душе́вную ему́ исцели́в, благове́рна показа́,/ с ни́мже и еретики́ от Бо́жия Це́ркве, я́ко во́лки, отгна́в,/ честны́й святи́телю Фео́доре,/ моли́ спасти́ся душа́м на́шим.

Кондак, глас 4.
Я́ко со́лнце, осиява́я све́тлым житие́м, Фео́доре, я́ве,/ вавило́нскому царю́ яви́ся чудесы́/ и сего́ уго́дника Христу́, святи́телю, показа́,/ с ни́мже ны́не Тро́ице предстоя́,/ нас помина́й, све́тло торжеству́ющих па́мять твою́, му́дре.

Ин кондак, глас тойже.
Благохоте́ния ра́ди/ просвеще́ннаго тобо́ю по благода́ти ча́да, честна́го Моа́вия,/ животворя́щаго дре́ва получе́ния,/ подви́гнуся во ца́рствующий град,/ и та́мо Христо́вою пе́рстию до́блей цари́це Феодо́ре о́ка зре́ние очи́сти,/ и отту́ду с жела́емым сокро́вищем па́ки в Вавило́не честна́го Моа́вия по Христе́ на муче́ние утверди́,/ сего́ ра́ди ти вопие́м:/ ра́дуйся, честны́й Фео́доре,/ учениче́ Христо́в, пасту́ше до́брый.

Прп. Иоанна Пещерника, иже в странах Вавилонских. Тропарь, глас 2.
Несумне́нно Христа́ иски́й,/ Христо́во бога́тство прия́ти наде́явся,/ зла́та грома́ду безнаде́жну сотво́рь,/ ско́ро прескочи́, я́ко я́же посреди́ Ла́заря и бога́таго про́пасть,/ и легко́ воспря́ну во авраа́мское не́дро,/ пусты́нный Иоа́нне, тезоимени́те благода́ти и прозра́чному го́луби,/ тем и от Бо́га прии́мый прозре́ния дар/ и честно́му Фео́дору епи́скопу изреки́й неви́денное писа́ние/ и благочести́ву царю́ Моа́вию му́ченический по́двиг./ Те́мнее мо́лим тя, о́тче:/ умоли́ Христа́ за ны, чту́щия тя.

Кондак, глас тойже.
Неявле́н бра́ту быв по взя́тии зла́та,/ но ничто́же утае́но ти быстъ о житии́ его́/ от Бо́га да́нным ти прозре́ния да́ром,/ целому́дренный Иоа́нне,/ живя́ше бо не себе́, но Христу́,/ тем и я́ди своея́ сла́достию царя́ честна́го Моа́вия преудиви́./ Сего́ ра́ди зове́м ти:/ ра́дуйся, обреты́й наде́жду в небе́снем Христо́ве бога́тстве.

Прп. Феодосия, столпника Едесского. Тропарь, глас 3.
Пре́жде запе́нся бога́тственною се́тию, я́ко челове́к,/ но последи́ нището́ю нестяжа́ния посрами́л еси́ врага́/ и моли́твами твои́ми, честны́й Феодо́сие,/ прия́т от Бо́га прозре́ния дар./ Тем и честно́му епи́скопу Фео́дору прорече́ о Святе́й Це́ркви,/ е́же на враги́ одоле́ние,/ и ны́не моли́ся Христо́ви за чту́щих тя.

Кондак, глас тойже.
Прему́дрости Бо́жия науче́нием/ недомы́слимо веща́ние столпа́ глаго́ля,/ от неразу́мных челове́к несмы́слен мня́шеся,/ но от Бо́га па́че прему́др проявля́шеся,/ ди́вный Феодо́сие,/ честна́го бо епи́скопа Фео́дора/ свои́ми словесы́ кре́пце вооружи́в, я́ко во́ина, на церко́вныя враги́,/ сего́ ра́ди от Бо́га на Небесе́х прии́м честны́х твои́х трудо́в воздая́ние.

Мч. Михаила сновидца. Тропарь, глас 5.
От до́бляго наста́вника Фео́дора/ чистоту́ тве́рдо извы́че,/ и от нече́стия цари́цы Сеи́ды/ целому́дрием по о́бразу Ио́сифа сохрани́ся,/ та́коже и нечести́ваго царя́ Адрамеле́ха/ прему́дрыми твои́ми глаго́лы пре́ния и ласка́ния низложи́в,/ и по Христе́ муче́ния венце́м увязе́ся,/ Богому́дрый Михаи́ле,/ Его́же моли́ спасти́ ду́ши на́ша.

Кондак, глас тойже.
В ю́ности цве́та свет небе́сный получи́л еси́,/ му́чениче Михаи́ле,/ наказа́нием честна́го твоего́ наста́вника Фео́дора,/ богода́нною же твое́ю си́лою/ в погребе́нии твое́м разсла́бленнаго стягну́л еси́,/ те́мже хва́ляще твоя́ страда́ния,/ Бо́гу сла́ву возсыла́ем.

Мч. Иоанна, прежде святого Крещения Моавия. Тропарь, глас 6.
И́же ко Христу́ ве́рою/ боле́знь теле́сную исцели́, с не́юже и душе́вную,/ наставля́емь от честна́го твоего́ учи́теля Фео́дора,/ сла́вный царю́ Моа́вие Иоа́нне,/ и, страда́ние по Христе́ ку́пно с ве́рными твои́ми треми́ о́троки сконча́в,/ яви́ся в царе́х му́ченик, в му́ченицех же царь,/ по Христе́ тече́ние сконча́в, от свои́х раб во́лею пострада́,/ и, сугу́бу честь от Бо́га прии́м,/ Его́же моли́ ку́пно с треми́ ве́рными твои́ми о́троки/ спасти́ся душа́м на́шим.

Кондак, глас тойже.
Пре́жде бы́вших вавило́нских царе́й неве́рие попра́в/ и одоле́в Новуходоно́сорову суровству́,/ честны́й царю́ Моа́вие Иоа́нне,/ он бо дре́вле три о́троки от Бо́га не одоле́, но посрами́ся,/ ты же, с собо́ю три о́троки име́я, врага́ одоле́/ и сих к Бо́гу приве́л еси́./ Сего́ ра́ди ти зове́м:/ ра́дуйся, премени́вый тле́нное ца́рство на нетле́нное.

Сщмч. Кирилла, еп. Гортинского. Тропарь, глас 3.
Гла́сом боже́ственным от темни́цы изведе́н,/ в Ри́ме бра́тию в боже́ственней ве́ре утверди́л еси́,/ и, от Áнгела глаго́лы прии́м о святи́тельстей па́стве,/ во страда́нии свое́м па́ки гла́су с Небесе́ сподо́бися,/ богоповеле́нный святи́телю и страда́льче Кири́лле,/ моли́ за ду́ши на́ша.

Кондак, глас тойже.
Ви́дев себе́ ра́ди темни́чныя две́ри отве́рсты в полу́нощи/ и и́долы сокруше́ны,/ и Горти́нскую па́ству святи́тельскую,/ от Бо́га повеле́нную, до́бре упас,/ и по Христе́ наде́ждно пострада́в,/ священному́чениче Кири́лле,/ моли́ся за чту́щия тя.