Православный календарь

СПРЯТАТЬ ТРОПАРИ

Собор преподобных отцов Псково-Печерских. Тропарь святых, глас 6.
Собо́р святы́х Пско́во-Пече́реких днесь почти́м,/ в де́брех лесны́х оби́тель чу́дную основа́вших,/ и, я́ко кри́ны, доброде́тельми процве́тших,/ и лю́дем пра́вый путь богоподо́бия указа́вших,/ мо́лят бо Го́спода/ ми́ру мир дарова́ти и ве́лию ми́лость.

Кондак, глас 3.
Тебе́, Богоро́дице/ и Де́ве Чи́стей, за вся лю́ди Бо́га умоля́ющей,/ оби́тель Пско́во-Пече́рская/ святы́х свои́х, я́ко дар, днесь прино́сит,/ Твои́х же даро́в бога́тство кто испове́сть,/ я́ко и в рай возвела́ еси́ отцы́ на́ша.

Тропарь воскресный, глас 3.
Да веселя́тся Небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь,/ попра́ сме́ртию сме́рть,/ пе́рвенец ме́ртвых бы́сть;/ из чре́ва а́дова изба́ви нас,/ и подаде́ ми́рови ве́лию ми́лость.

Богородичен, глас тойже.
Тя хода́тайствовавшую спасе́ние ро́да на́шего,/ воспева́ем, Богоро́дице Де́во:/ пло́тию бо от Тебе́ восприя́тую Сын Твой и Бог наш,/ Кресто́м восприи́м стра́сть,/ изба́ви нас от тли я́ко Человеколю́бец.

Кондак, глас тойже.
Воскре́сл е́си днесь из гро́ба, Ще́дре,/ и нас возве́л еси́ от врат сме́ртных;/ днесь Ада́м лику́ет, и ра́дуется Éва,/ вку́пе же и проро́цы с патриа́рхи воспева́ют непреста́нно/ Боже́ственную держа́ву вла́сти Твоея́.

Равноп. Ольги, вел. кн. Российской, во святом Крещении Елены. Тропарь, глас 1.
Крила́ми Богоразу́мия впери́вши твой ум,/ возлете́ла еси́ превы́ше ви́димая тва́ри,/ взыска́вши Бо́га и Творца́ вся́ческих,/ и То́го обре́тши, па́ки рожде́ние Креще́нием прия́ла еси́:/ дре́ва живо́тнаго наслажда́ющися,/ нетле́нна во ве́ки пребыва́еши, Óльго присносла́вная.

Ин тропарь, глас 8.
В тебе́, Богому́драя Еле́но, изве́стен спасе́ния о́браз бысть в Ру́сстей стране́,/ я́ко, прии́мши ба́ню свята́го Креще́ния, после́довала еси́ Христу́,/ творя́щи же и уча́щи, е́же оста́вити и́дольскую пре́лесть,/ восприя́ти же попече́ние о души́, ве́щи безсме́ртней,/ те́мже и со Áнгелы ра́дуется, равноапо́стольная, дух твой.

Ин тропарь, глас 4.
Оста́вивши лесть и́дольскую,/ после́довала еси́ Христу́, Безсме́ртному Жениху́, Óльго Богому́драя,/ в Его́же черто́зе ра́дующися,/ непреста́нно моли́ся/ о чту́щих ве́рою и любо́вию святу́ю па́мять твою́.

Ин тропарь, еллинский, глас 3.
Свята́я равноапо́стольная избра́ннице Христо́ва, княги́не Óльго,/ наро́д твой слове́сным и чи́стым Христо́вым млеко́м напои́вшая,/ моли́ся Ми́лостиву Бо́гу,/ да прегреше́ний оставле́ние/ пода́ст душа́м на́шим.

Ин кондак, глас 4.
Яви́ся днесь благода́ть всех Бо́га,/ просла́вльши в Руси́ Óльгу Богому́друю,/ моли́твами ей, Го́споди,/ лю́дем пода́ждь/ грехо́м оставле́ние.

Кондак Ольги, глас 4.
Воспое́м днесь Благоде́теля всех Бо́га,/ просла́вльшаго в Росси́и Óльгу Богому́друю,/ да моли́твами ея́/пода́ст душа́м на́шим/ грехо́в оставле́ние.

Вмц. Евфимии всехвальной. Тропарь, глас 4.
Áгница Твоя́, Иису́се, Евфи́мия/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя, да и живу́ с Тобо́ю,/ но, я́ко же́ртву непоро́чную, приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

Или сей тропарь, глас тойже.
Жениха́ твоего́ Христа́ возлюби́вши/ и свещу́ твою́ све́тлу угото́вльши,/ доброде́тельми возсия́вши, всехва́льная Евфи́мие,/ тем возшла́ еси́ с Ним на брак,/ вене́ц страда́ния от Него́ прие́мши./ Но от бед изба́ви нас,/ чту́щих ве́рою па́мять твою́.

Ин кондак, глас 4.
Во страда́нии свое́м до́бре подвиза́ся/ и по сме́рти нас освяща́еши чуде́с тече́нием, всехва́льная./ Тем твое́ успе́ние пое́м,/ ве́рою прибега́юще в Боже́ственную твою́ це́рковь,/ да изба́вимся неду́г душе́вных и чуде́с благода́ть поче́рпем.

Кондак, глас 6.
По́двиги во страда́льчестве, по́двиги в ве́ре/ положи́ла еси́ те́пле за Христа́, Жениха́ твоего́./ Но и ныне я́коже е́реси и враго́в шата́ние/ под но́ги во́инству на́шему покори́ти моли́ Богоро́дицею,/ я́же от шести́сот три́десяти Богоно́сных оте́ц/ преде́л прие́мшая/ и храня́щая, всехва́льная.

Рудненской иконы Божией Матери. Тропарь, глас 4.
К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи:/ Тя бо и еди́ну наде́жду и́мамы.

Кондак, глас 6.
Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́:/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Обретение и перенесение мощей преподобного Аркадия Вяземского и Новоторжского. Тропарь, глас 4.
От духо́внаго наста́вника, отца́ преподо́бнаго Ефре́ма, наставля́емь,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́/ и, и́нок быв изря́дный,/ до́брым по́двигом ревну́яй,/ от Христа́ Бо́га прия́л еси́ вене́ц сла́вы Небе́сныя;/ и ны́не вку́пе с преподо́бным отце́м Ефре́мом у Престо́ла Вы́шшяго предстоя́,/ о нас моли́ся, изба́витися нам от всех бед и скорбе́й/ и спасти́ся душа́м на́шим.

Кондак, глас 2.
К глубина́м Боже́ственнаго ра́зума впери́в ум свой,/ в Небе́сныя оби́тели восте́кл еси́,/ и равноа́нгельно житие́, о́тче Арка́дие, на земли́ пожи́л еси́,/ и во всем повину́лся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас.