Православный календарь

СПРЯТАТЬ ТРОПАРИ

Тропарь воскресный, глас 2.
Егда́ снизше́л е́си к сме́рти, Животе́ Безсме́ртный,/ тогда́ ад умертви́л е́си блиста́нием Боже́ства:/ егда́ же и уме́ршия от преиспо́дних воскреси́л еси́,/ вся Си́лы Небе́сныя взыва́ху:/ Жизнода́вче, Христе́ Бо́же наш, сла́ва Тебе́.

Богородичен, глас тойже.
Вся па́че смы́сла,/ Вся пресла́вная Твоя́, Богоро́дице, та́инства,/ чистоте́ запеча́танной, и де́вству храни́му,/ Ма́ти позна́лася еси́ нело́жна,/ Бо́га ро́ждши И́стиннаго;/ Того́ моли́ спасти́ся душа́м на́шим.

Кондак, глас тойже.
Воскре́сл еси́ от гро́ба, Всеси́льне Спа́се,/ и ад ви́дев чу́до, ужасе́ся,/ и ме́ртвии воста́ша;/ тварь же ви́дящи сра́дуется Тебе́,/ и Ада́м свесели́тся,/ и мир, Спа́се мой, воспева́ет Тя при́сно.

Иконы Богородицы "Знамение". Тропарь, глас 4.
Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Кондак, глас 4.
Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.

Тропарь мученика Иакова Персиянина, глас 4.
Муче́нии странноужа́сными и до́блестию терпе́ния/ всех преудиви́л еси́, многострада́льне,/ над ко́имждо соста́вом удеси́ ре́зания,/ благода́рны мольбы́ преди́вне изре́кл еси́ Го́споду./ Тем, во стра́дании твое́м вене́ц прие́м,/ к Престо́лу возше́л еси́ Небе́снаго Царя́ Христа́ Бо́га, Иа́кове,/ Того́ моли́ спасти́ ду́ши на́ша.

Кондак, глас 2.
Уве́рився до́брою сопру́жницею, терпеливоду́шне,/ и стра́шнаго Суди́ща убоя́вся,/ Пе́рсское повеле́ние и страх, Иа́кове, поплева́л еси́/ и яви́лся еси́ му́ченик честны́й,/ те́лом, я́ко розга́, ре́жемь.

Тропарь прп. Палладия, глас 1.
Мона́шествовав Богоуго́дно, Богоно́сне о́тче наш,/ моли́твою и посто́м Бо́га взыска́л еси́/ и был еси́ прия́телище чи́сто Ду́ха,/ блиста́я ве́рным доброде́тельныя зари́,/ и́миже просвеща́еши вся чту́щия тя./ Сла́ва просла́вльшему тя Христу́,/ сла́ва Укре́пльшему тя,/ сла́ва Де́йствующему тобо́ю всем исцеле́ние.

Свт. Иакова, еп. Ростовского. Тропарь, глас 4.
Избра́н от ю́ности Бо́гови быв,/ святи́телю Иа́кове,/ сего́ ра́ди архиере́йства са́ном почте́н,/ упа́сл еси́ лю́ди, я́же тебе́ Бо́гом вруче́нныя./ Те́мже и по преставле́нии/ чуде́с дарова́ния от Бо́га прия́л еси́/ исцеля́ти разли́чныя неду́ги./ Моли́ о нас, соверша́ющих честну́ю па́мять твою́,/ да тебе́ непреста́нно велича́ем.

Кондак, глас 8.
Я́ко архиере́ев сопресто́льник/ и святи́телем изря́дный побо́рник был еси́, святи́телю Иа́кове,/ непреста́нно сохраня́й оте́чество твое́, град же и лю́ди,/ тебе́ ве́рою почита́ющия и честны́м моще́м твои́м покланя́ющияся,/ да велегла́сно тебе вопие́м:/ ра́дуйся, Иа́кове Богому́дре.

Блгв. кн. Новгородского Всеволода, во св. Крещении Гавриила. Тропарь, глас 4.
Наста́ днесь всечестны́й но́вый пра́здник,/ обре́тение честны́х моще́й/ блаже́ннаго кня́зя Гаврии́ла,/ веселя́щи изря́дно всех благочести́вых мно́жества,/ те́мже, вси ве́рнии,/ соше́дшеся во святы́й храм Живонача́льныя Тро́ицы, возопие́м:/ блаже́нне кня́же Гаврии́ле,/ име́я дерзнове́ние ко Христу́ Бо́гу,/ моли́ спасти́ся пра́зднующим любо́вию па́мять твою́.

Кондак, глас 8.
Возвесели́ся, Христо́ва це́рковь,/ иму́щи в себе́ исто́чника чудесе́м оби́льна./ Днесь, любо́вию соше́дшеся в тя, лю́дие твои́,/ во обрете́ние честны́х моще́й блаже́ннаго кня́зя Гаврии́ла,/ воспое́м песнь еди́ному Бо́гу в Тро́ице, ра́дующеся,/ сподо́бльшаго нас ви́дети пречестно́е сокро́вище, мо́щи его́,/ от мног лет сокрове́нны, напосле́док же нам явле́ны./ Я́ко да моли́твами его́ к Бо́гу от всех находя́щих зол изба́вимся/ и ра́достною душе́ю и весе́лием се́рдца/ благода́рная воспое́м, глаго́люще:/ ра́дуйся, утвержде́ние гра́ду на́шему.

Прп. Феодосия Терновского. Тропарь, глас 3.
В блаже́ннем безмо́лвии пусты́ннем/ и на собо́рех, любо́вию к Бо́гу горя́,/ посрами́л еси́ лука́вых бесо́в и ерети́к злочести́вых./ На моли́тве же стоя́, огня́ све́тлостию просия́л еси́/ и преставле́нием твои́м Áнгелов пою́щих обвесели́л еси́,/ Феодо́сие, о́тче наш,/ се́го ра́ди мо́лим тя:/ моли́ся о душа́х на́ших.

Кондак, глас 8.
Пропове́дник велегла́сный Боже́ственных догма́т/ на собо́рех святы́х был еси́, о́тче му́дре,/ цари́ умудря́я и в ве́ре утвержда́я;/ благода́тию же Боже́ственною осиява́ем,/ загради́л еси́ уста́ злосла́вных, Феодо́сие./ Сего́ ра́ди вопие́м ти:/ ра́дуйся, Бо́лгарская похвало́/ и Правосла́вия све́тлое ра́дование.

Преподобномученика Кронида, архимандрита Радонежскаго. Тропарь, глас 1.
Преподо́бному Се́ргию от ю́ности после́дуя,/ о́тче богому́дре Крони́де,/ ве́ру во Святу́ю Тро́ицу стяжа́л еси́/ и да́же в ста́рости масти́те до кро́ве сохрани́л еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти си́лу терпе́ния,/ сла́ва Увенча́вшему тя я́ко му́ченика,/ сла́ва Спаса́ющему тобо́ю ду́ши на́ша.

Кондак, глас 2.
Я́ко ве́рный учени́к преподо́бнаго Се́ргия,/ послуша́нием, смире́нием и моли́твою/ ду́шу твою́ очи́стил еси́, Крони́де приснопа́мятне,/ и Бо́жиим промышле́нием во игу́мена оби́тели Тро́ицкия/ досто́йно поста́влен был еси́./ Во дни же гоне́ния лю́таго/ за Христа́ и вве́ренную ти бра́тию/ я́ко му́ченик пострада́л еси́./ Сего́ ра́ди ны́не, предстоя́ Святе́й Тро́ице,/ моли́, е́же Ла́вре Се́ргиевой утвержде́нней бы́ти/ и спасти́ся душа́м на́шим.