Православный календарь

СПРЯТАТЬ ТРОПАРИ

Тропарь воскресный, глас 8.
С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да нас свободи́ши страсте́й,/ Животе́ и воскресе́ние на́ше, Го́споди, сла́ва Тебе́.

Богородичен, глас тойже.
И́же нас ра́ди рожде́йся от Де́вы,/ и распя́тие претерпе́в, Благи́й,/ испрове́ргий сме́ртию сме́рть,/ и воскресе́ние явле́й я́ко Бог,/ не пре́зри, я́же созда́л е́си руко́ю Твое́ю;/ яви́ человеколю́бие Твое́, Ми́лостиве,/ приими́ ро́ждшую Тя Богоро́дицу моля́щуюся за ны;/ и спаси́, Спа́се наш, лю́ди отчая́нныя.

Кондак, глас тойже.
Воскре́с из гро́ба, уме́ршия воздви́гл еси́,/ и Ада́ма воскреси́л еси́,/ и Éва лику́ет во Твое́м Воскресе́нии,/ и мирсти́и концы́ торжеству́ют/ е́же из ме́ртвых воста́нием Твои́м, Многоми́лостиве.

Прп. Евфимия Великого. Тропарь, глас 4.
Весели́ся, пусты́ня неражда́ющая,/ благоду́шствуй, неболя́щая,/ я́ко умно́жи тебе́ ча́да муж жела́ний духо́вных,/ благоче́стием насади́в,/ воздержа́нием воспита́в доброде́телей в соверше́нство,/ Того́ моли́твами, Христе́ Бо́же,/ умири́ живо́т наш.

Кондак, глас 8.
В че́стнем рождестве́ твое́м ра́дость тварь обре́те/ и в Боже́ственней па́мяти твое́й, преподо́бне,/ благоду́шие прия́т мно́гих твои́х чуде́с,/ от ни́хже пода́ждь бога́тно в ду́ши на́ша и очи́сти грехо́в скве́рны,/ я́ко да пое́м: аллилу́ия.

Тропарь Евфимия Болгарского, глас 4.
По́двигом пусты́нным просия́л еси́/ и на престо́л первосвяти́тельства по достоя́нию возше́л еси́,/ отону́дуже луча́ми Богове́дения и доброде́тели всех озари́л еси́/ и ча́шу му́ченичества безкро́вно отпи́л еси́./ Ны́не же предстоя́ престо́лу Го́рняго Иерусали́ма, Евфи́мие,/ моли́ седя́щаго на нем Христа́ Бо́га на́шего/ о почита́ющих честну́ю па́мять твою́.

Кондак, глас 8.
Во бра́ни неви́димой быв победи́тель,/ от Вы́шния десни́цы вене́ц прия́л еси́,/ Евфи́мие, преподо́бне о́тче наш,/ во бра́ни же с злочести́выми неодоле́нный,/ усугу́бил еси́ мзду твою́ в кро́вех Небе́сных./ Те́мже воспева́ем ти такова́я:/ ра́дуйся, страда́льче безкро́вный земли́ Бо́лгарския.

Тропарь Евфимия Архангелогородскаго, глас 4.
Я́ко сокро́вище многоце́нно/ и исто́чник, излива́ющ то́ки исцеле́ний,/ пода́де нам Христо́с честны́я мо́щи твоя́,/ преподо́бне Евфи́мие,/ боле́зни у́бо отъе́млющия страсте́й разли́чных,/ благода́ть же душа́м точа́щия непреста́нно,/ Éгоже моли́ дарова́ти нам ве́лию ми́лость.

Кондак, глас 3.
Пра́зднует днесь Арха́нгелов град пра́здник пресве́тлый светоно́сныя твое́я па́мяти,/ вся созыва́я окре́стныя его́,/ ра́дуется бо, я́ко стяжа́в сокро́вище ве́лие — честны́я мо́щи твоя́, преподо́бне Евфи́мие,/ его́же сохраня́й всегда́ моли́твами твои́ми от все́х зол, да зове́м ти:/ ра́дуйся, о́тче, благоду́шию тезоимени́те.

Преподобнаго Евфимия схимника, в Дальних пещерах почивающаго. Тропарь, глас 4.
Евфи́мие всече́стне,/ преподо́бным единоревни́телю и Áнгелом собесе́дниче,/ получи́вый с ни́ми житие́м свои́м чи́стым и безмо́лвным ве́чная блага́я,/ моли́ся Го́сподеви при́сно о всех нас,/ да и мы тех же благ сподо́бимся.

Кондак, глас 4.
Я́ко прия́л еси́ схи́му,/ бысть вы́ну тих и молчали́в, преподо́бне,/ никогда́же бо ни с ким, ра́зве моли́тв ко Го́споду,/ ничесо́же глаго́лал еси́,/ и пи́щи, ра́зве зе́лия су́рова, нико́ея же вкуша́л еси́./ Тем обре́т днесь пи́щу неижди́вущую на Небеси́, Евфи́мие,/ моли́ и нам то́яжде причасти́тися.

Прп. Лаврентия, затворника Печерского, в Дальних пещерах. Тропарь, глас 3.
Затвори́вый себе́ Го́спода ра́ди в те́мней пеще́ре,/ преподо́бне о́тче Лавре́нтие, многоле́тне/ и Óному до́бре в ней угоди́вый,/ пода́ждь и нам от вся́каго зла чу́вствия затвори́ти,/ и тьмы страсте́й отврати́тися,/ и све́тлость получи́ти Ца́рствия Небе́снаго.

Кондак, глас 4.
Бог, реки́й из тьмы све́ту возсия́ти,/ проси́я тебе́ из те́мна ме́ста, я́ко свет,/ и зна́ема всем показа́, Лавре́нтие,/ я́ви же и Све́ту невече́рнему тя прича́стника, преподо́бне,/ в не́мже лику́я, помина́й нас, хва́лящих тя.