Православный календарь

СПРЯТАТЬ ТРОПАРИ

Тропарь воскресный, глас 8.
С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да нас свободи́ши страсте́й,/ Животе́ и воскресе́ние на́ше, Го́споди, сла́ва Тебе́.

Богородичен, глас тойже.
И́же нас ра́ди рожде́йся от Де́вы,/ и распя́тие претерпе́в, Благи́й,/ испрове́ргий сме́ртию сме́рть,/ и воскресе́ние явле́й я́ко Бог,/ не пре́зри, я́же созда́л е́си руко́ю Твое́ю;/ яви́ человеколю́бие Твое́, Ми́лостиве,/ приими́ ро́ждшую Тя Богоро́дицу моля́щуюся за ны;/ и спаси́, Спа́се наш, лю́ди отчая́нныя.

Кондак, глас тойже.
Воскре́с из гро́ба, уме́ршия воздви́гл еси́,/ и Ада́ма воскреси́л еси́,/ и Éва лику́ет во Твое́м Воскресе́нии,/ и мирсти́и концы́ торжеству́ют/ е́же из ме́ртвых воста́нием Твои́м, Многоми́лостиве.

Святых отцев VII Вселенского Собора. Тропарь, глас 8.
Препросла́влен еси́, Христе́ Бо́же наш,/ свети́ла на земли́ отцы́ на́ши основа́вый/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.

Кондак, глас 6.
И́же из Отца́ возсия́в, Сын неизрече́нно/ из Жены́ роди́ся сугу́б естество́м,/ Его́же ви́дяще, не отмета́емся зра́ка изображе́ния,/ но, сие́ благоче́стно начерта́юще,/ почита́ем ве́рно./ И сего́ ра́ди и́стинную ве́ру Це́рковь держа́щи,/ лобыза́ет ико́ну вочелове́чения Христо́ва.

Ин. тропарь, глас 2.
Пречи́стому о́бразу Твоему́ покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на Крест,/ да изба́виши, я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Мчч. Евлампия и Евлампии. Тропарь, глас 4.
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Кондак, глас 3.
До́блия му́ченики и бра́тию по пло́ти,/ му́драго Евла́мпия и Евлампи́ю, почти́м:/ ти́и бо пребеззако́нных козноде́йства посрами́ша си́лою Распе́ншагося:/ сего́ ра́ди яви́шася му́чеников сла́ва, ку́пно и похвала́.

Прп. Амвросия, старца Оптинского и всея России чудотворца. Тропарь, глас 5.
Я́ко к целе́бному исто́чнику/ притека́ем к тебе́, Амвро́сие, о́тче наш./ Ты бо на путь спасе́ния нас ве́рно наставля́еши,/ моли́твами от бед и напа́стей охраня́еши,/ в теле́сных и душе́вных ско́рбех утеша́еши,/ па́че же смире́нию, терпе́нию и любве́ науча́еши./ Моли́ Человеколю́бца Христа́/ и Засту́пницу усе́рдную/ спасти́ся душа́м на́шим.

Кондак, глас 2.
Заве́т Пастыренача́льника испо́лнив,/ ста́рчества благода́ть насле́довал еси́,/ боле́знуя се́рдцем о всех, с ве́рою притека́ющих к тебе́./ Те́мже и мы, ча́да твоя́, с любо́вию вопие́м ти:/ о́тче святы́й Амвро́сие,/ моли́ Христа́ Бо́га спасти́ся душа́м на́шим.

Свт. Амфилохия, еп. Владимиро-Волынского. Тропарь, глас 4.
От мирска́го мяте́жа изше́д,/ в пеще́рах Ки́евских Феодо́сия блаже́ннаго Богому́дренно всели́лся еси́,/ святи́телю Христо́в, о́тче Амфило́хие,/ и отсю́ду во епи́скопа Богоспаса́емей па́стве Влади́миро-Волы́нстей поста́вленный,/ в труде́х, бде́ниих и поще́ниих свя́то подвиза́лся еси́./ И та́ко дости́г доброде́телей соверше́нства,/ па́ки в пеще́ры святы́я возврати́лся еси́,/ иде́же и дух свой благоче́стно преда́л еси́ Го́сподеви, всече́стне,/ к ли́ку преподо́бных Пече́рских причте́н,/ с ни́ми же моли́ся Христу́, всече́стне,/ спасти́ся душа́м на́шим.

Кондак, глас 8.
Звезду́ Волы́нскую, из пеще́рнаго мра́ка от Ки́ева возсия́вшую,/ и от Волы́ни второ́е пеще́ры заве́тныя житие́м свои́м/ и блаже́нною кончи́ною, и прославле́нием свои́м озари́вшаго,/ всеблаже́ннаго Амфило́хия, архипа́стыря Влади́миро-Волы́нскаго почти́м,/ прося́ще его́, да в ли́ке преподо́бных Пече́рских водворя́яся,/ мо́лится ку́пно с ни́ми о душа́х на́ших.

26 прпмчч Зографского м-ря. Тропарь, глас 1.
Тревелича́йшия свети́льники,/ всех преподобному́ченик Богоизбра́нный полк,/ дваде́сять и шесть Боже́ственныя оби́тели Зогра́фския оте́ц, почти́м,/ пре́лесть лати́нскую обличи́вшия/ и наси́льственно во огни́ сконча́вшияся;/ Фому́ пастыренача́льника, свяще́ннаго Варсоно́фия,/ достосла́внаго Парфе́ния и про́чия, подвиза́вшияся,/ соше́дшеся, пе́сньми почти́м,/ сии́ бо Тро́ицу Святу́ю/ при́сно о нас умоля́ют.

Кондак, глас 8.
И́же оби́тели нашея́ засту́пницы и храни́телие,/ преподо́бнии отцы́ да похва́лятся,/ лесть латиня́н отве́ргшия/ и, огне́м сожже́нный, сконча́вшияся и венча́вшияся,/ и́хже досто́йно воспои́м, зову́ще:/ ра́дуйтеся, преподо́бнии му́ченицы.

Собор Волынских святых. Тропарь, глас 4.
Приспе́ день све́тлаго торжества́,/ лю́дии Волы́нстии ра́дуются,/ и с ни́ми вся Росси́йская Це́рковь ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять/ святы́х и Богому́жных уго́дников и чудотво́рцев Волы́нских/ святи́теля Стефа́на чу́днаго,/ иера́рхом Волы́нским первопресто́льника,/ и свята́го благове́рнаго Яропо́лка/, блаже́ннаго страда́льца Богому́жнаго,/ и с ни́ми Амфило́хия, святи́теля Волы́нскаго,/ и победоно́снаго Фео́дора, Острóжскаго кня́зя Богодаро́ваннаго,/ и преподóбнаго И́ова Поча́евскаго присноблаже́ннаго/, и́хже моли́твами, Го́споди,/ зе́млю оте́ческую на́шу в Правосла́вии и ми́ре утверди́,/ и спаси́ всех иму́ще ку́пно о нас Моли́твенницу усе́рдную,/ Пресвяту́ю Ма́терь Свою́ Богоро́дицу,/ благода́тне сия́ющую в цельбоно́сней стопе́ Свое́й/ и чудотво́рней ико́не на горе́ Поча́евстей/ и заступле́ньми про́чих уго́дников Волы́нския па́ствы,/ Иулиа́нии, блаже́нныя де́вы Ольша́нския,/ и свята́го преподобному́ченика Мака́рия, архимандри́та Óвручскаго.

Ин тропарь, глас 4.
Приспе́ день све́тлаго торжества́,/ оби́тель Пече́рская ра́дуется/ и с не́ю благослове́нная Поча́евская Ла́вра ликовству́ет/ во псалме́х и пе́ниих, и пе́снех духо́вных,/ днесь бо, я́коже со́лнце незаходи́мое,/ всем возсия́ па́мять/ преподо́бных и Богоно́сных оте́ц Пече́рских,/ от ни́хже во́лею Бо́жиею изыдо́ша/ первонача́льницы и́ноческаго жития́ на горе́ Поча́евстей,/ и́хже моли́твами, Го́споди,/ зе́млю оте́чественную на́шу в Правосла́вии и ми́ре утверди́/ и поми́луй всех, иму́ще ку́пно о нас Моли́твенницу и Засту́пницу усе́рдную,/ Пречи́стую Ма́терь Свою́ Богоро́дицу,/ от лет дре́вних благода́тне сия́ющую в цельбоно́сней стопе́ Свое́й/ и чудотво́рней Свое́й ико́не во оби́тели Поча́евстей/ в просвеще́ние и спасе́ние душ на́ших.

Кондак 8.
Избра́нным чудотво́рцам и изря́дным уго́дником Волы́нския земли́,/ похва́льная воспису́ем вам, святи́и:/ Яропо́лче святы́й, Стефа́не, Амфило́хие, Фео́доре,/ Иулиа́ние, И́ове и Мака́рие, присноблаже́ннии!/ Тем я́ко иму́щий благода́ть и ми́лость у Христа́ Бо́га на́шего,/ от вся́ких нас бед свободи́те/ да вы́ну ва́шею по́мощию избавля́емии, вопие́м вам благода́рне:/ ра́дуйтеся, пресла́внии уго́дницы Бо́жии и земли́ Волы́нския украше́ние.

Ин кондак, глас 8.
Избра́ннии от родо́в уго́дницы Бо́жии,/ преподо́бнии Пече́рстии:/ Мерку́рие и Симео́не, Акинди́не же, Лукиа́не, Па́мво и Полика́рпе,/ Авраа́мие, Алекси́е, Евста́фие, Елла́дие, Ефре́ме, Иерони́ме,/ Луко́, Мела́дие, Они́симе, Пе́рсие, Па́вле, Се́ргие,/ Сисо́е и Фео́филе, Анато́лие же, Афана́сие, Иси́доре, Кассиа́не,/ Лавре́нтие, Пафну́тие, Пио́ре, Сисо́е вторы́й и Софро́ние/, от ни́хже изыдо́ша первонача́льницы/ и́ноческаго жития́ на горе́ Поча́евстей,/ вас не потаи́ла есть земля́,/ Не́бо же и ра́йския селе́ния отверзо́шася вам./ Те́мже мы, похва́льная пе́сни Бо́гу,/ просла́вльшему вас в па́мяти ва́шей, принося́ще/ и честны́й Собо́р ваш вселюбе́зно почита́юще,/ из глубины́ душе́вныя вопие́м вам:/ от всех бед ва́шими моли́твами заступа́йте нас, зову́щих,/ ра́дуйтеся, Пече́рстии чудотво́рцы/ и оби́тели Поча́евския сла́ва и утвержде́ние.

Блж. Андрея, христа ради юродивого. Тропарь, глас 4.
Терпе́нием и му́жеством Христа́ ра́ди юро́дство восприя́л еси́, блаже́нне Андре́е,/ в посте́ и бде́нии пребыва́я,/ тя́гость зно́я ле́тняго поне́сл еси́,/ и мра́зы зи́мния терпя́,/ те́мнее и ны́не приходя́щим с ве́рою к тебе́,/ исцеле́ние неоску́дно подае́ши,/ моли́ Христа́ Бо́га спасти́ся душа́м на́шим.

Кондак, глас 8.
Вы́шния красоты́ жела́я,/ и ни́жния сла́сти теле́сныя то́щно оста́вил еси́ нестяжа́нием су́етнаго ми́ра,/ Áнгельское житие́ преходя́, сконча́вся, Андре́е блаже́нне,/ с ни́ми же Христа́ Бо́га моли́ непреста́нно о всех нас.