Православный календарь

СПРЯТАТЬ ТРОПАРИ

Всех новоявленных мучеников Христовых, по взятии Царяграда пострадавших. Тропарь, глас 3.
Но́вии му́ченицы,/ дре́внюю пре́лесть тве́рдым боре́нием низложи́вшии,/ вознесо́ша ве́ру правосла́вных,/ беззако́нное бо служе́ние уничижи́вше,/ дерзнове́нно Христа́ пропове́даша,/ Бо́га соверше́нна,/ и ны́не непреста́нно мо́лятся/ дарова́ти нам ве́лию ми́лость.

Кондак, глас 1.
Весели́ся та́инственно, Христо́ва Це́рковь,/ ви́дящи своя́ сыны́, но́выя му́ченики,/ о́крест трапе́зы твоея́ стоя́щия в моще́х,/ я́ко новосажде́ния ма́сличная,/ и Зижди́телю всех возопи́й:/ Ты му́чеников еси́, Христе́, утвержде́ние.

Собор Новгородских святых. Тропарь чудотворцем Новгородским, глас 8.
Я́ко всесве́тлии свети́льницы,/ яви́стеся во стране́ сей,/ святи́телие Новгоро́дстии, преподо́бнии, и Христа́ ра́ди юро́дивии, и вси пра́веднии,/ посто́м насажде́ннии воздержа́нием напая́еми,/ сего́ ра́ди и сподо́бистеся бы́ти прия́телище Бо́жия Ду́ха/ и чудеса́ де́йствовати,/ моли́те Христа́ Бо́га за вся лю́ди,/ спасти́ся душа́м на́шим.

Ин тропарь, глас 4.
Пусты́нное житие́ возлюби́вше, преподо́бнии отцы́,/ яви́стеся Новгоро́дстей стране́, я́ко ино́е со́лнце,/ озаря́юще сию́ мо́лниями чуде́с ва́ших,/ и просвеща́ете ве́рою воспева́ющих вам:/ ра́дуйтеся, по́стников похвало́ и пра́ведных удобре́ние.

Кондак, глас 5.
Преподо́бнии отцы́ и чудотво́рцы,/ уго́дницы Христо́вы,/ Новогра́дстии свети́льницы,/ и́же а́нгельским житие́м просия́вше,/ Боже́ственных сподо́бистеся даро́в,/ Спа́су служа́ще со Áнгелы непреста́нно,/ моли́те изба́витися нам от вся́каго прегреше́ния/ и душа́м на́шим дарова́ти ве́лию ми́лость.

Всем преподобным отцам Вологодским. Тропарь, глас 8.
Я́ко свети́льницы всесве́тлии,/ яви́стеся в преде́лех гра́да Во́логды,/ преподо́бнии отцы́ на́ши, Волого́дстии чудотво́рцы:/ вы бо, крест Христо́в от ю́ности своея́ на ра́мена взе́мше,/ усе́рдно Тому́ после́довали есте́,/ чистото́ю Бо́гови прибли́жившеся,/ от Него́же и чуде́с дарова́нием обогати́стеся;/ те́мже и мы, с ве́рою к вам притека́юще, уми́льно глаго́лем:/ отцы́ преподо́бнии, моли́те Христа́ Бо́га/ спасти́ся душа́м на́шим.

Ин тропарь, глас 2. (Творение Вологодскаго епископа Иннокентия)
Правосла́вия наста́вницы,/ благоче́стия и чистоты́ учи́телие,/ Це́ркве Волого́дския богодарова́нное украше́ние,/ моли́те Ми́лостиваго Бо́га,/ да ва́шим предста́тельством пода́стся благода́ть и мир стране́ на́шей/ и душа́м на́шим спасе́ние.

Ин кондак, глас 2.
Волне́ний мно́жество невла́жно проходя́ще,/ безпло́тныя враги́ струя́ми слез ва́ших кре́пко погрузи́ли есте́,/ Богому́дрии и преподо́бнии,/ и, чуде́с дар прии́мше,/ моли́те непреста́нно о всех нас.

Кондак, глас 4.
Светоно́сный о́блак свиде́телей ве́ры и благоче́стия,/ осеня́ющ преде́лы страны́ на́шея,/ утверди́л еси́, Христе́ Царю́, на тве́рди Це́ркве Волого́дския,/ да, взира́юще на сконча́ние жи́тельства их и вене́ц сла́вы неувяда́емый,/ терпе́нием тече́м на предлежа́щий нам по́двиг спасе́ния.

Собор Белорусских святых. Тропарь святых, глас 5.
Почти́ Госпо́дь Белору́сский край/ святы́ми, Ему́ благоугоди́вшими:/ святи́тели, му́ченики, преподо́бными и пра́ведными,/ ве́рно Го́сподеви послужи́вшими/ и мзду трудо́в прия́вшими./ К тем же ны́не и мы вопие́м:/ о нас моли́теся ко Го́споду,/ да в ве́ре и де́лех плод добр принесе́м.

Кондак, глас 3.
Бо́жии уго́дницы Белору́сския земли́/ ны́не со дерзнове́нием предстоя́т Престо́лу Святы́я Тро́ицы/ и неви́димо за ны мо́лятся Бо́гу,/ о кра́е на́шем,/ прося́ нам мир и ве́лию ми́лость.

Тропарь воскресный, глас 2.
Егда́ снизше́л е́си к сме́рти, Животе́ Безсме́ртный,/ тогда́ ад умертви́л е́си блиста́нием Боже́ства:/ егда́ же и уме́ршия от преиспо́дних воскреси́л еси́,/ вся Си́лы Небе́сныя взыва́ху:/ Жизнода́вче, Христе́ Бо́же наш, сла́ва Тебе́.

Богородичен, глас тойже.
Вся па́че смы́сла,/ Вся пресла́вная Твоя́, Богоро́дице, та́инства,/ чистоте́ запеча́танной, и де́вству храни́му,/ Ма́ти позна́лася еси́ нело́жна,/ Бо́га ро́ждши И́стиннаго;/ Того́ моли́ спасти́ся душа́м на́шим.

Кондак, глас тойже.
Воскре́сл еси́ от гро́ба, Всеси́льне Спа́се,/ и ад ви́дев чу́до, ужасе́ся,/ и ме́ртвии воста́ша;/ тварь же ви́дящи сра́дуется Тебе́,/ и Ада́м свесели́тся,/ и мир, Спа́се мой, воспева́ет Тя при́сно.

Владимирской иконы Богородицы. Тропарь, глас 4.
Днесь све́тло красу́ется сла́внейший град Москва́,/ я́ко зарю́ со́лнечную восприе́мши, Влады́чице,/ чудотво́рную Твою́ ико́ну,/ к не́йже ны́не мы притека́юще и моля́щеся. Тебе́ взыва́ем си́це:/ о, пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит град сей/ и вся гра́ды и страны́ христиа́нския невреди́мы от всех наве́т вра́жиих,/ и спасе́т ду́ши на́ша, я́ко Милосе́рд.

Ин кондак, глас 8.
Взбра́нней Воево́де и Засту́пнице, Де́ве и Богоро́дице,/ в чи́стей со́вести, ве́рою утверди́вшеся, ру́сстии наро́ди,/ невозвра́тно наде́жду иму́ще, притеце́м,/ к чудотво́рному Ея́ и пречи́стому о́бразу, и возопие́м Éй:/ ра́дуйся, Неве́сто Неневе́стная.

Кондак, глас 8.
Взбра́нной Воево́де победи́тельная,/ я́ко изба́вльшеся от злых прише́ствием Твоего́ честна́го о́браза,/ Влады́чице Богоро́дице,/ све́тло сотворя́ем пра́зднество сре́тения Твоего́/ и обы́чно зове́м Ти:/ ра́дуйся, Неве́сто Неневе́стная.

Собор Владимирских святых. Тропарь, глас 4.
Днесь све́тло красу́ется Пресвяты́я Богоро́дицы избра́нный град/ и с ним вси концы́ земли́ Влади́мирския торжеству́ют,/ па́мять соверша́юще богопросла́вленнаго вели́каго ли́ка святы́х,/ в по́двизех Правосла́вныя ве́ры издре́вле во уде́ле сем Бо́гу угоди́вших,/ и к ним с любо́вию вопию́т:/ о преди́внии Христу́ Бо́гу моли́твенницы,/ венцы́ пресве́тлыми от Него́ увенча́нныя,/ мир и благоде́нствие оте́честву ва́шему испроси́те/ и душа́м на́шим ве́лию ми́лость.

Кондак, глас 4.
Я́ко зве́зды пресве́тлыя Це́ркве Росси́йския,/ испове́данием Правосла́вныя ве́ры в той возсия́вшии,/ вси святи́и земли́ Влади́мирския:/ Богому́дрии святи́телие и благове́рнии кня́зи,/ преподо́бнии отцы́ и ма́тери,/ страстоте́рпцы и пра́ведницы,/ Христу́ Бо́гу усе́рдно моли́теся,/ грехо́в оставле́ние дарова́ти/ любо́вию чту́щим святу́ю па́мять ва́шу.

Мц. Агриппины. Тропарь, глас 4.
Áгница Твоя́, Иису́се, Агрипи́на/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ради́,/ я́ко да ца́рствую в Тебе́,/ и умира́ю за Тя, да и живу́ с Тобо́ю;/ но, я́ко же́ртву непоро́чную, приими́ мя, с любо́вию поже́ршуюся Тебе́./ Той моли́твами, я́ко Ми́лостив, спаси́ ду́ши на́ша.

Кондак, глас 4.
Све́тлых по́двиг твои́х светоно́сный наста́ день,/ во́ньже почита́ющи сих, Боже́ственная Це́рковь вся созыва́ет ве́село вопи́ти тебе́:/ ра́дуйся, де́во и му́ченице, Агрипи́но всечестна́я.

Прав. отрока Артемия Веркольского. Тропарь, глас 2.
Вы́шняго повеле́нием,/ тучено́сным облако́м, не́бо помрачи́вшим/ и мо́лниям блиста́ющим,/ гро́му же возшуме́вшу с преще́нием,/ испусти́л еси́ ду́шу твою́ в ру́це Го́сподеви,/ прему́дре Арте́мие,/ и ны́не предстои́ши Престо́лу Влады́ки всех,/ и́же ве́рою и любо́вию приходя́щим к тебе́,/ подая́ исцеле́ние всем неотло́жно/ и моля́ся Христу́ Бо́гу,/ спасти́ся душа́м на́шим.

Кондак, глас 8.
Возсия́ днесь пресве́тлая па́мять прему́драго Арте́мия;/ Богода́нная благода́ть, я́ко ре́ки, излива́ет от целе́бных моще́й его́ ди́вная исцеле́ния,/ и́миже от многоразли́чных неду́г избавля́емся,/ с ве́рою прие́млюще я и взыва́юще:/ ра́дуйся, Арте́мие Богому́дре.

Свт. Германа, архиеп. Казанского. Тропарь, глас 4.
От ю́ности и́го Христо́во усе́рдно восприи́м,/ бде́нными по́двиги поста́ и моли́твы просла́вился еси́./ Отону́дуже призыва́ющу тя Бо́гу на служе́ние Це́ркви/ в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же я́ко первонача́льник/ созда́нной тобо́ю в гра́де Свия́жске оби́тели/ и досто́йный первосвяти́телю прее́мник яви́лся еси́./ Ду́хом предстоя́ Престо́лу Влады́чню,/ моли́ся, святи́телю Ге́рмане, со святи́телем Гу́рием/ правосла́вной па́стве во благоче́стии преспева́ти/ и тьме инове́рия све́том ве́ры разгна́тися.

Кондак, глас 4.
До́блестями преподо́бия и пра́вды/ вруче́нное тебе́ слове́сное ста́до озаря́я/ и на зла́чных Сло́ва Христо́ва па́житях пита́я,/ на пра́вый путь за́поведей Госпо́дних/ си́лою ду́ха твоего́ наставля́л еси́ е./ Те́мже и ны́не, осеня́емое цельбоно́сными чудотворе́нии твои́ми,/ в святу́ю па́мять твою́, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем удобре́ние.

Прп. Иосифа Заоникиевского. Тропарь, глас 5.
Смиренному́дрием наказа́ние благоду́шне прие́мля,/ и́же от Небе́с неизрече́нный дар прия́ти сподо́бился,/и в пло́ти сый, преподо́бне,/ безпло́тен в служе́нии свое́м к Богома́тери трудолю́бие подвиза́ся,/ бде́нии, поще́нии, слеза́ми и моли́твами,/ и́миже и пусты́ню многожи́тельну устро́ил еси́,/ благоухищре́нным же юро́дством челове́ческия сла́вы избежа́./ Сего́ ра́ди Всевы́шний Мздовозда́тель/ в коне́ц ве́ка сего сугу́бо тя просла́ви,/ и гроб твой святы́й точе́нием чуде́с обогати́ся,/ Его́же моли́, преподо́бне о́тче наш Ио́сифе,/ дарова́ти нам отпуще́ние грехо́в и ве́лию ми́лость.

Кондак, глас 8.
Вы́шних благ жела́яй,/ преоби́дел еси́ до́лу влеку́щая мудрова́ния,/ и́бо трудолюби́вое свое́ те́ло/ о́стрым власяны́м плете́нием стерл еси́,/ и бысть благоуго́ден служи́тель Богома́тере,/ стра́ждущим в неду́зех явля́яся, ско́ро помога́еши,/ и с ве́рою притека́ющим к тебе́ неоску́дное здра́вие подае́ши./ Сего́ ра́ди зове́м ти:/ разреши́ н́аша боле́зни душе́вныя и теле́сныя/ е́же к Бо́гу моли́твами твои́ми,/ началообра́зный смире́нию наста́вниче, о́тче наш Богому́дре Ио́сифе,/ мона́хом удобре́ние.